Tiro lagu qiyaasay 82-ruux ayaa la sheegay in ey ku nafqaayeen dagaalo labadii cisho ee lasoo dhaafay ka dhacay qeybo ka mid ah caasimadda Somaliya ee Muqdisho, waxaana dagaaladani oo u dhexeeyay ciidamada dowladda iyo kuwa Itobia oo isku garab ahaa iyo kooxaha kasoo hor jeeda ey sidoo kale geysteen qasaare hantiyeed balaaran iyo dhaawacyo kor u dhaafaya 110-ruux.

Dadkan ku nafwaayay dagaaladan ayaa intooda badano la sheegay in ey ahaayeen dad rayid ah, waxaana sidoo kale jiray khasaarooyin ba`an oo soo kala gaaray garabyada ku dagaalanay degmooyinka Huriwaa iyo Yaaqshiid.

Mid ka mid ah dadka deegaanka ayaa sheegay in madaafiic aan loo meel dayin isaga dul-habsanayeen guryaha, walow tirada rasmiga ah ee ku dhimatay dagaaladan aan wali si rasmi ah loo xaqiijin karin marka laga reebo 82- ee la sheegay.

Waxaa sidoo kale la geeyay cusbitaalada Madiina iyo Dayniile ee magaalada Muqdisho labadii maalmood ee lasoo dhaafay dhaawacyo kor u dhaafaya 100.

Dagaalkan oo ahaa midkii ugu xooga badnaa mudooyinkan danbe ayaa ahaa mid fool ka fool ah oo ey si ba`an isu faro saareen qolooyinka ey dirirtu u dhexeysay.