Kooxaha kasoo horjeeda dowladda ayaa waxaa la xaqiijiyay in habeenkii xalay ay galeen Gudaha Magaalada Baladweyne iyaga oo halkaasina markii ay galeen afka aadiyay dhanka Xarumaha Dowladda.
Xoogagani ayaa lagu soo waramayaa in ay dab qabadsiiyeen Xarunta Guddoomiyaha Gobolka Hiiraan Yuusuf dabageed iyo xarumo kale iyadoo mar waliba ay rasaas kor u ridayeen.

Isla habeenkii xalay ayaa waxaa iska casilay shaqadii ay u hayeen Maamulka gobolka qaar kamid ah Mas’uuliyiinta Gobolka Hiiraan kadib markii ay u baqeen Naftooda sida ay iyagu afkooda ka sheegteen.

Mas’uuliyiintii xilka iska casishay ayaa waxaa kamid ahaa Guddoomiyaha Arrimaha Bulshada Mr.Arwaax, Guddoomiyaha arimaha dhaqaalaha ee Maamulka Gobolka Hiiraan Maxamed Kaynaan Xuushow iyo Guddoomiye ku xigeenka Arimaha siyaasada Degmada Baladweyne Ibraahim Rashiid Cali.

Dhammaantood waxa ay sheegeen in ay u baqeen naftooda taasina ay ku qasabtay in ay iska casilaan shaqadii ay hayeen, waxaana ay sheegeen in wixii maanta ka dambeeya ay kamid yihiin bulshada rayidka ah.

Waa markii ugu horeysay oo mas’uuliyiin katirsan Maamulka Gobolka Hiiraan ay iska casilaan shaqadooda kadib hanjabaadyo kasoo gaaray kooxaha kasoo horjeeda dowladda