Gudoomiyaha ururka dib u xoreynta Somaliya Sheekh Shariif Sheekh Axmed iyo xubno ka tirsan ururkaasi ayaa ka ambabaxay dalka Jabuuti oo ey maalmahani danbe ku sugnaayeen iyagoo safarkoodu ku wajahnaa sida nalaoo xaqiijiyay magaalada Asmara ee dalka Eritrea oo xarun u ah.

Wafdiga Sheekha ayaa dhawaan soo gaaray dalka Jabuuti halkaasoo ey kulamo kula qaateen madaxda dalka Jabuuti oo uu horkacayay madaxweyne Geelle iyo odayaal dhaqameedyo Somaliyeed oo ka tirsan beelaha Hawiye kuwaasoo iyana dhawaan Soo gaaray isla Jabuuti.

Imaatinta wafdiga Sheekh Shariif ee Jabuuti ayaa lagu sheegay in uu la xiriiray wadatashiyo ey la sameynayeen madaxda dalkaasi iyo odayaasha mucaaradka ee beelaha Hawiye kaasoo ku aadan arinta d/heshiisiinta iyo wadahadal ey dhawaan la furi doonaan dowladda federalka.

Magaalada Asmara oo ey iminka ku laabteen wafdigan ayaa waxaa ey xarun u tahay isbaheysiga dib u xoreynta Somaliya, waxaana lagu wadaa in ey warbixin ka siiyaan isbaheysiga intiisa kale waxa ey wafdigu kala soo kulmeen dalka Jabuuti.