Warar laga helaayo ilo wareedyo ku sugan Suuq Bacaad suuqa labaad ee ugu weyn magaalada Muqdisho, ayaa sheegaya in xaalada Suuq Bacaad ay saakay tahay mid aad u kacsan, kadib markii xalay Weerar ku soo qaadeen Maleeshiyaad ka amar qaata Hogaamiye Kooxeedyada Max'ed Dheere & M.W.Darwiish, kuwaasoo doonaayay iney bililiqeystaan goobo cayiman oo ganacsi kadib markii Ganacsatada suuqaasi ay diideen iney bixiyaan taakuleynta dhaqaalaha Maleeshiyaadka Kooxda Imbagati ee u socotay magaalada Jowhar oo sahan la'aan xoogan soo food saartay.

Wararka ayaa sheegaya in Ciidamo ka tirsan kuwa ilaaliya Suuqaasi ay ka horjoogsadeen Maleeshiyadaasi oo ku hubeysneyd ku dhowaad 4 gaadiidka dagaalka ah oo ay kala lahaayeen Max'ed Dheere & Max'ed Darwiish, Maleeshiyadaan ayaa xiligaasim ku guda jiray falal jebin ah dukaano ganacsi oo suuqaasi ku yaala, waxeyna wararku intaasi raaciyeen inay dagaal muddo gaaban socday uu halkaasi ka dhacay, iyadoo mid ka mid ah maleeshiyaadkii Imbagati ee dhaca waday uu dhaawac soo gaaray kaasi oo ilaa saakay uu yaallay dhaawicisa goobtaasi waxaana Ilaalada Suuqaasi ay diideen in la qaado. isku dhac xoogan ayaa ka dhex qarxay labada dhinac ayaan aheyn midkii ugu horeeyay iyadoo maleeshiyaadka Hogaamiye Kooxeedyada kooxda Imbagati ay caado ka dhigteen iney boobaan bililiqeystaan hantida dadka rayidka ah.