Xubno ka tirsan Golaha Dhaqanka iyo Midnimada Beelaha Hawiye ayaa maanta ka dhoofay Garoonka Diyaaradaha Aadan Cadde ee Magaalada Muqdisho, kadib markii ay casuumaad ka heleen Sheekh Shariif Sheekh Axmed oo ah Guddoomiyaha Isbaheysiga dib u xoreynta Soomaaliya.
Safarka Odayaasha Hawiye oo ah kii u horeeyay ee ay dalka uga ambabaxaan tan iyo markii Dowladda la wareegtay Magaalada Muqdisho, isla markaana muddo dhuumaaleysanayay ayaa waxaa horkacayay Gudoomiyaha Golahaas Maxamed Xasan Xaad iyo Afhayeenada Golahaas Axmed Diiriye waxaana xubno ka ah C/llaahi Dheere, Siraaji iyo xubno kale.

Mas'uuliyiinta maanta ka dhoofay Muqdisho ayaan la garaneyn halka ay kula kulmayaan Sheekh Shariif oo madax u ah Mucaaradka Dowladda, inkastoo ay wararka intaa raacinayaan in diyaaradii qaaday ay tegeyso Dalka Jabuuti, wallow wararka ay qaar ayaa sheegay in kulankasi uu ka dhacayo magalada Asmara ee Dalka Eritrea.

Wararka aan iminka heleyno ayaa sheegaya in ay gaareen Magaalada Jabuuti inkastoo weli aanan la sheegin cidda kusoo dhaweysay halkaasi lakin waxaa la dejiyay hoteello halkaasi kuyaalla.

Waa markii ugu horeeyay oo Odayaashani ay gaaraan Dalka Jabuuti inkastoo aanan la ogeyn waxa ay kawada hadli doonaan iyaga iyo Mas’uuliyiinta ugu sareysa ee Isbaheysiga Asmara.