Wararka naga soo gaaray deegaanka Cigaal Holel ee u dhexeeya leego iyo Buur Hakaba ayaa sheegaya in halkaasi ay ku waxyeeloobeen 3 gaadiidka Uuraalaha Itoobiyaanka kuwaasi oo kuso jeeday Muqdisho kadib markii weerar culus lagu qaaday.

Wariye madax banaan oo ku sugan deegaanka Leego aya sheegay in ay maqleen dhowr saalbo oo Baasuukayaal ah iyo qaraxyo waaweyn kuwasi oo lala eegtay gaadiidkii Itoobiyaanka iyadoona ay taasi keentay in qarakood bas beelaan.

Ciidamada Itoobiyaanka ayaa weerarkaasi kadib lagu beegsaday bambaanooyinka gacanta iyo sidoo kale qoryaha fud fudud iyadona mudo daqiiqado ah kadib ay arrintu dhamaatay.

Ciidamo Itoobiyaan ah oo aad u careysan ayay wararku sheegayaan in ay gudaha u galeen deegaanada ku teedsan goobta weerarka halkaasi oo ay kasoo qab qabteen dad fara badan oo xoolo dhaqato u badan.

Xoogaga Al-Shabab ayay wararku sheegayaan in ay weerarkaasi qaadeen sida wariyaha madax banaan uu sheegay iyadoona aysan aheyn marki ugu horeysay ee xoogagaasi weerar kaasi lamid ah ay isla goobtaasi ka geystaan.

Dhawaan ayay la wareegeen gaadiid ay lahaayeen wasiiro ka tirsan dawladda Federaalka kadib weerar gaadmo ah oo ay ku dileen ilaa 4 askari ayna ku qaateen hub fara badan.