C/llaahi Yuusuf Axmed oo maanta la kulmay wafdi kasocday QM ee gaaray wadanka Jabuuti ayaa waxa uu ka codsaday sidii QM ay  ciidamo ugu soo diri laheyd wadanka Soomaaliya kahor inta aysan ka bixin wadanka Soomaaliya Ciidamada Itoobiyaanka.

"Ka bixitaanka Ciidamada Itoobiya keliya waxaa lagu heli karaa oo shuruudeenna ah in ugu horeyn la keeno dalka Ciidamo kasocda QM oo iyagu badala isla markaana la joojiyo weerarada" ayuu yiri C/llaahi Yuusuf oo intaasi ku daray oo si cad uu u sheegay in ladoonayo in Amniga Soomaaliya aanu la baneynin oo aanu laga faa'ideysan.

C/llaahi Yuusuf ayaa hadalkani ka sheegay kulanka uu layeeshay maanta wafdiga QM kasocda, waxaana ajendihiisa ugu weyn uu ahaa sida wararka lagu helayo in Itoobiyaanka aanan dalka laga saarin inta laga keenayo Ciidamo kasocda QM si ammaanka dalka uusan faraha uga bixin sida uu isaga hadalka u dhigay C/llaahi Yuusuf.

Wada hadallada uga soconaya wadanka Jabuuti dowladda TFG-da iyo mucaaradka oo ah wejigiisa labaad ayaa kiisii hore waxa uu dhamaaday 16-ka bishii may ee lasoo dhaafay iyadoo iminkana weli labada dhinac ee ladoonayo in ay wada hadlaana ay kudhegan yihiin mawqifyadooda, waxaana Isbaheysiga Asmara ay weli kudhegan yihiin in ugu horeyn wada hadal iyo dib u heshiisiin kahor laga wada hadlo sidii dalka looga saari lahaa Ciidamada Itoobiyaanka kadibna la wada hadlo.

Lama garanayo sida uu kusoo gaba gaboobi doono wada hadalka jabuuti, waxaana shirka jabuuti uu yahay keliya wada hadal halka dadka ay isku qaldayaan in uu yahay dib u heshiisiin, waxaana dib u heshiisiinta la xaqiijiyay in ay dhaceyso marka lagu guuleysto wada hadalka.