Ra’iisul Wasaaraha Cusub oo kullan xasaasi ah la qaatay golaha Wasiirada Xukuumadii Farmaajo.

Wararka ka imaanaya caasimada Magaalada Muqdisho ayaa sheegaya in haatan kullan aan caadi ahayn oo albaabada u laaban xarunta Madaxtooyada Villa Somalia uga socdo golihii Wasiiradii hore Xukuumadii Farmaajo ee Is-casilay iyo Ra’iisul wasaaraha cusub Xukuumadda KMG ee Soomaaliya Dr. C/weli Maxamad Cali Gaas.

Kullanka oo ah mid loo diiday in ay ka qeyb gasho warbaahinta Muqdisho waxaa looga hadlayaa xaaladaha dalka Soomaaliya iyadoo diirada lagu saarayo soo xulida gole Wasiiro oo ka mid ah noqda Xukuumadda laga sugayo inuu soo magacaabo Ra’iisul Wasaaraha Cusub.

Ma jiraan wax war ah oo ka soo baxay kullanka oo wali socda, laakiin waxaa la filayaa marka uu soo gaba gaboobmo kadib saxaafada loo faah faahin doono natiijooyinka ka soo baxa kullankaasi oo ah mid aad u xasaasi ah.

Ugu danbeyntii kullankan ayaa imaanaya xili Ra’iisul Wasaaraha cusub Xukuumadda KMG Soomaaliya Dr. C/weli Maxamad Cali Gaas looga hadhiyo in ka yar 30 cesho gudahood inuu ku soo magacaabo Gole Wasiiro Waxtar leh, isla markaana ah kuwo tiro yar oo aan sidaasi u buurnayn.