Sheekh Shariif oo shaaciyay dib u heshiisiintu in aysan hakan doonin haddii xitaa meesha uu ka baxo R/Wasare Nuur Cadde.

Gudoomiyaha Isbaheysiga Xoreynta Sheekh Shariif Sheekh Axmed ayaa shaaciyay in ay cid waliba oo Somali ah dan ugu jirto sii socoshada hanaanka wadahadalka iyo dib u heshiisiinta isla markaana aanu arag in qof ama dad gaar ah ay u hakan doonto dib u heshiisiinta haatan socota.

Sheekh Shariif waxaa uu farta ku goday in xitaa aysan wal wal ka qabin hadii meesha ay ka baxaan kooxda haatan heshiiska la gaartay dhinacooda in heshiiskaasi uu bur burayo maadaama uu cadeeyay in beesha Caalamka ay taageersan tahay.

Waxa uu wadaadkaasi waayihii ugu danbeeyay u heelanaa dib u heshiisiinta iyo xabad joojinta ugu baaqay dhamaan shacabka Somaliyeed in ay taageeraan heshiiska xabad joojineed iyo dib u heshiisiinta si guud ahaaneed.Gudoomiye Sheekh Shariif waxaa sidoo kale ugu baaqay dhamaan hey'daha samafalka in ay gargaar deg deg la gaaraan dalka Somaliya isla markaana ay gacan qabtaan shacabka tabaaleysan xilli ay soo galeyso bisha barakeysan ee Ramadaan.