Sh. Xasan Turki oo dib uga laabanaya Kismayo kadib markii uu gacan ka geystay qabashadeeda

Wararka naga soo-gaaraya magaalada Kismaayo ee Xarunta Gobolka Jubada Hoose ayaa sheegaya in kulan albaabada u xiran-yihiin ay isugu yimaadeen saraakiisha Jabhada Islaamiga Soomaaliyeed ee (Jabiso) iyo kuwa Ururka Alshabaab.

Kulankan ayaa looga arin-saday sidii maamul mideysan oo ku-meel gaar ah loogu sameyn-lahaa magaalada Kismaayo,iyadoo lagu balamay in maamul ku meel-gaar ah oo ay u wada dhanyihiin dadka deegaanka kuna dhisan shareecada Islaamka laga hir-geliyo magaalada.

Sheekh Xasan Al-Turki oo kulan ka hadlay,sida aan xog-hoose ku-helnay ayaa sheegay inuu saacadaha soo socda dib oogu noqon-doono,saldhigyada ay ciidamadiisu ku leeyihiin Hawdka Gobolka Jubadda-Hoose,lamana yaqaan ilaa iyo hadda sababta Sheekha ku-keliftay inuu Saraakiisha ciidamada ogeysiiyo,inuu dib oogu noqonayo Hawdkiisii uu kaga dhuumanayey gantaalaha Mareykanka oo Sheekha u-baadi-goobaya,sidii ka dhacday oo kale Magaalada Dhuusamareeb oo ay Gantaalo Mareykanku la beegsadeen Alaha u naxariistee Macalin Aadan Xaashi Ceyrooow.

Dhinaca kale Ciidamada oogu tirada badan ee magaalada Kismaayo qabsaday, tiradoodana lagu qiyaasay 850 ayaa ka yimid,Magaalooyinka Buulo-Xaaji,Kudhaa,Janaay-Cabdala iyo Caanoole,waxaana oogu cad-cadaa Saraakiishii dagaalkan hogaaminaysay:

1-Sheekh Mustafa Cali Mire
2-Sheekh Xasan Yacquub (Baaba-Raqiis)
3-Sheekh Dhaga-Caleen Nuur Cali
4-Sheekh Xasan Turki
5-Sheekh Abuu Muslim
6-Macalin Bare.

Xubnahan waxay dhamaantood ka mid yihiin Saraakiisha Jabhada Islaamiga Soomaaliyeed ee (Jabiso)oo iyagu ah Jabhad wada-shaqeyn kala dhaxeyso Maxaakiimta,marka laga reebo Sheekh Xasan Turki oo isagu ka tirsan Ururka Alshabaab,inkastoo warar aan ka helnay ilo-lagu kalsoon-yahay ay sheegayaan in Sheekha laga yaabo inuu ku biiro Jabhada Islaamiga Soomaaliyeed (Jabiso)maaadaama magaca Alshabaab ay Beesha Caalamka ku shaabadaysay Arga-gaxiso.

Dhinaca kale Shacabka Magaalada Kismaayo ayaa wejiyadooda laga dareemay farxad iyo reyn-reyn aan la qiyaasi-karin,maadaama laga dul-qaaday Maleeshiyo aan cidna ka amar-qaadan.