Warar lagu kalsoon yahay oo soo gaaraya Aayaha.com ayaa tilmaamaya in xoogagga xaq u dirirka Soomaaliyeed ee dagaalka kula jira ciidamada cadowga ah ee Itoobiya ay gaareen, isla markaana gacanta ku hayaan Suuqa Jamhuuriya ee degmada Kaaraan.

Xoogagga xaq u dirirka ayaa guullo la taaban karo maanta ka gaaray dagaalada ay kula jiraan ciidamada cadowga, iyagoo jebiyay duullaan xooggan oo ay ciidamada cadowgu saakay kusoo qaadeen goobihii ay shalay dagaaladu ka dhaceen.

Suuqa Jamhuuriya ee ay xoogagga xaq u dirirku gacanta ku dhigeen ayaa kaabiga u saaran Hotel Lafweyn oo xarun u ah ciidamada cadowga Itoobiya, lamana oga in ciidamada cadowgu isaga cararaeen xaruntaas.

Goobihii saakay lagu dagaalamay ayey joog joogayaal degaankaas ku sugan sheegeen in ay arkeen meydadka Itoobiyaanka oo daadsan dariiqyada.

Ciidanka cadowga ee lagu jebiyay dagaalkii maanta ayaa bilaabay in ay madaafiic ku garaacaan xaafadaha rayidku degaan ee magaalada sida degmooyinka Huriwaa iyo Yaaqshiid.

Ciidamada naf la caariga ah ee Itoobiya ayaa marka ay ku jabaan dagaalada ay kula jiraan xoogagga xaq u dirirka waxey bilaabaan in ay madaafiic ku garaacaan shacabka Muqdisho.

Madaafiicda ay tuurayaan ciidamada cadowga oo weli ku dhaceysa xaafadaha Muqdisho ayaan la ogeyn khasaaraha ay geysteen baaxadda uu la egyahay.

Duqeyntii ay shalay ciidamada cadowgu u geysteen xaafadaha Muqdisho ayaa waxaa ku naf waayay ugu yaraan 30 qof, iyadoo 130 kalena ay ku dhaawacmeen.