Warar dheeraad ah ayaa kasoo baxaya Qarax aad u weyn oo si culus u gilgilay Hoyga R/wasaaraha Dowladda KMG Pro. Cali Maxamed Geedi, iyadoona wararku ay yihiin kuwa daqiiqad kasta isa-sootaraya.
Goobjoogayaasha ayaa xaqiijinaya in Laba gaari oo Market2 ah oo laga soo buxiyey walxaha qarxa ay bartamaha u galeen Guriga Prof. Geedi, Islamarkaana uu hakaasi ka dhacay qarax aad u culus oo ruxay agagaarka xaafadda Mariinaayo ee Degmada C/casiis.
Wararku waxa ay sheegayaan in gawaarida oo ay saarnaayeen Laba qof oo naftood hurayaal ah, islamarkaana kusoo labistay dareyska Ciidamada Dowladda ay soo jiireen Koontorolka laga galo guriga ka dibna ay bartamaha u dhigeen guriga.
Lama xaqiijin karo khasaaraha rasmiga ah ee goobtaasi ka dhacay hase ahaatee waxaa la xaqiijinayaa in la arkayey Gawaari Tiknika ah oo ku gubanaya bartamaha guriga R/wasaaraha.
Ciidamada Nabad-Ilaalinta Midowga Africa ee Uganda iyo kuwa Ethiopia ayaa durbadiiba isku gedaamay guriga R/wasaare Geedi iyo wadooyinka soo gala iyagona halkaasi ka wada baaritaano ballaaran.
|
