Warar laga helayo ilo lagu kalsoonaan karo ayaa sheegaya in ciidamo ay leedahay dawladda Itoobiya oo ku sugnaa Soomaaliya, loona keenay inay maxkamadaha la dagaallamaan ay haatan isaga carareen Soomaaliya oo ay doonyo halkaasi uga baxsaden.
Ciidamo ku dhaw boqol askari oo ka tirsanaa kuwa cadawgu kula soo duulay ayaa iska dhiibay dalka Yemen iyagoo halkaasina ku gaaray doomo yar yar. Waxay ciidamadan iyo sarkaalkii watayba ay sheegeen inay u adkaysan wayeen dagaalka kulul ee kasoo wajahay maxkamadaha kaasoo isu bedelay dagaal gaadmo iyo kudhufoo ka dhaqaaqba leh.

Ciidamadan oo filalyey in haddii dhirbaaxo weyn lagu dhufto maxkamadaha uu dagaalku dhaqso usoo afjarmayo, looguna sheekeeyey in dhawr asbuc ka dib ay soo laaban doonaan ayaa la kulmay iska caabin iyo dagaal dib ugu qabsada caasimadda, iyagoo la kulmay dagaal ay maydkoodii qaadan waayeen oo maalmo wadooyinka Xamar ku qurmay.

Baxsiga ciidamadan ayaa muujinaya in ciidamada cadawgu inkastoo ay hub badan haystaan uu moraalkoodu aad hooseeyo aysanna jirin sabab damiirkoodu ku qanci karo oo ay Soomaaliya uga dagaallamaan, waxaana ay ahaayeen kuwa amar malatari iyo jajuub ku galaya dagaalka, qandaraaska xukuumadoodu qaadatayna aan ka helin daryeel ballaaran.

Dhanka kale xoogga iskacaabinta oo laga hub badan yahay ayaa iyaga oo Alle kaashanaya uu moraalkoodu aad u sarreeya mar haddii ay ku dhimanayaan difaaca dalkooda iyo diintooda, Allena ay ka rajaynayaan inuu garabkooda buuxiyo.