Wasaarada Arrimaha dibada Kenya oo sheegtay in ay dalka ka ceyrin doonaan Prof. Geeddi hadii lagu helo cadeymo rasmi ah

Wasiirka Arrimaha dibada Kenya Moses Watengula ayaa isagoo ka qeyb galaya shirka looga hadlayo is badalda cimilada aduunka ee ka dhacaya magaalada Copenhagen ee dalka denmark, waxaa uu xaqiijiyay in ay soo gaartay wasaaradiisa qoraal ashtako ah oo ay soo dirtay wasaarada arrimaha dibada soomaaliya.

Moses Watengula ayaa sheegay in Kenya aaney raali ka aheyn wax walba oo lagu xagal daacinayo jiritaanka dowladda soomaaliya, isagoo soo qaatay go'aano ay horay u gaareen urur goboleedka IGAD, kaasoo dhigaya in la cunaqabateeyo ama xayiraad dhanka maaliyada la saaro shaqsiyaadka iyo ururrada xad-gudubka ku ah geedi socodka nabada soomaaliya.

"Anaga kuma ogeyn Cali geeddi dhaq-dhaqaaq maji-xaabin ah oo ka dhan ah dowladda, waligiis Kenya ayuu deganaa, hadana waxaan la soconeynaa dhaq-dhaqaaqyada uu wado"ayuu yiri Moses Watengula oo sheegay in hadii ay cadeyn ku helaan ay dalka ka ceyrin doonaan.

R/wasaarihii hore ee soomaaliya hadana ah xildhibaan ka tirsan baarlamaanka Prof. Cali geeddi ayaa maalmahan ka waday nairobi dabin-daabyo ka dhan ah dowladda soomaaliya, iyadoo qorshayaal xagal daacin ah uu si hoose uga wado Hoyga uu ku leeyahay Nairobi.

Dowladda Itoobiya iyo Talyaaniga ayaa la rumeysan yahay in ay gadaal ka riixayaan qorshayaasha Geeddi ka wado Nairobi, iyadoo dowladahaas ay hada lumiyeen doorkii siyaasada ay ku lahaayeen soomaaliya.