Gudiga Culimada Oo Kulamo La Yeeshay Yuusuf Indhacadde

Kadib markii laga Qabsaday Gobolka Shabeelada hoose maleeshiyadkii daacada u ahaa Hogaamiye kooxeedka Yuusuf Siyaad Indhacadde, isla markaasna uu dhowaan la wareegay Fariisimada Warshada baastada & Degmada Afgooye, ayuu hadda wuxuu ku mashquulsan yahay sidii uu mar kale u duulan qorsheysan ku qabsan lahaa Magaalooyinka Marka, Qoryooley, Baraawe, W/weyne & Kurtiwarey, wuxuuna hadda magaalada Muqdisho ka wadaa  abaabulo xoogan & hub uruursi.

Xogtaan ayaa tilmaamtay in dhowaan uu kulamo la yeeshay Guddiga Culimada sixida kuwaasoo doonayay iney ka dhegsytaan aragtidiisa ku aadan sidii loo dhameyn lahaa xiisadaha u dhaxeeya Garabka uu ka tirsan yahay ee Asmara & Gudoomiyaha Isbaheysiga Sheekh Shariif Shariif Sheekh Axmed, waxaa la sheegay in shuruudo uu ku xiran la kulanka Sheekh Shariif isagoo sheegay in marka hore lagu taageero dib u qabsashada Degmooyinka uu ka kooban yahay Gobolka Sh/hoose iyo jagooyin aan la cayimin loo balan qaado dowlada dhowana la dhisi doono.

Kulankaan oo ahaa mid qarsoodi ah ayaa waxaa looga hadlay sidii uu Yusuf Indhacade looga dhaadhicin lahaa in la dhameeyo khilaafyada kala dhaxeeya Isbaheysiga dib Xoreynta, iyo sidii uu taageero heshiiska Jabuuti. Gudigga Culimada ayaa u sheegay ineysan awoodin iney ku taageeraan qodobka ah dib u qabsashada Gobolkaasi, iyagoo sabab uga dhigay inuusan ka soo jeedin Gobolkaasi dhalasho ahaan, balse waxey ugu baaqeen inuu u dhego nuglaado baaqyada nabadeed ee loo soo jeedinaayo isla markaasan uu ka qeyb qaato sidii loo nabadeyn lahaa magaalada Muqdisho iyo guud ahaan dalka Soomaaliya, waxaana la sheegay in kulankaasi uu ku dhamaaday natiijo la'aan.

Hogaamiye kooxeedkaani ayaa la sheegay in maleeshiyaad & hub uu ku uruursaday Degmada Afgooye, wuxuuna dhowaan qorsheynayaa inuu weerar ku qaado degaanka Janaale & shalaambood, kadib markii uu ku fashilmay weerarkii uu dhowaan ku qaaday tuulada KM-60, halkaasoo khasaare balaaran uu ka soo gaaray isla markaasna looga qabsaday laba gadiid dagaal ah. Si loo fuliyo heshiiskaas ayaa Yusuf Indhacade uu qabsaday magaalada Afgooye, maleeshiyo beeleedkiisana ay weerareen deegaanka KM 60.

Dad badan oo ka soo jeeda gobolka Shabeelada Hoose ayey fajiciso ku noqotay in Hogaamiye Kooxeedkani uu mar kale damco inuu xoog ku qabsado degaan uusan u dhalan, waxeyna sheeeen in xooga iyo dhaqaalaha uu u huraayo Gobolka Sh/hoose, looga baahan yahay inuu u diro degaanka uu dhab ahaan ka soo jeedo ee Guricel halkaas oo dagaalo ay ka wadaan Maleeshiyaadka Shabaabka ee uu hormuudka ka yahay Madaxa Shabakadaasi Axmed Cabdi Godane, kaasoo hadda ku sugan degaanka Mareer gur ee u dhow magaalada Dhusa mareb ee Gobolka G/guduud.