Dowladda Somalia Oo Beenisay In Ciidamo Itoobiyaan Soo Galeen Gobolka Hiiran.
Dowladda KMG ah ayaa maanta beenisay in ciidamo Itoobiyaan ah gudaha u soo galeen gobolka Hiiraan ee bartamaha dalka Somalia xilli ciidamada Itoobiya dhaqdhaqaaqyo ka wadaan gobolka Hiiran.
Shir jaraa'id oo uu maanta ku qabtay magaalada Muqdisho wasiirka Amniga Qaranka dowladda KMG ah C/laahi Maxamed Cali Sandaloolshe ayuu ku sheegay inaysan jirin wax ciidamo Itoobiyaan ah oo soo galay gudaha dalka Somalia gaar ahaan gobolka Hiraan.
Wuxuu sheegay in la buun-buuniyey wararkaas islamarkaana aysanba ciidamada Itoobiya soo galin gobolka Hiiran, isagoona sheegay inay ku sugan yihiin xadka ay la wadaagaan dalka Somalia.
"Dadku waxay arkeen ciidanka dowladda oo ay u qaateen inay Itoobiyaan ah yihiin, Ciidamo Itoobiyaan oo magaalada Baledweyne soo galay ma jiraan waxay ku sugan yihiin xuduudooda" ayuu yiri wasiirka Amniga Qaranka dowladda KMG ah C/laahi Maxamed Cali Sandaloolshe oo la hadlay warbaahinta Magaalada Muqdisho.
Wuxuu intaas ku daray in Dowladda Itoobiya ay xaq u leedahay inay ilaaliso amaankeeda islamarkaana ay dhaqdhaqaaqyo ciidan ka sameyso xadka ay la wadaagto dalka Somalia.
Si kastaba ha ahaatee hadalka wasiirka Amniga Qaranka ayaa ku soo beegmaya xilli ciidamo fara badan oo Itoobiyaan ah ay ku sugan yihiin isgoyska Kalabeyrka ee gobolka Hiraan halkaas oo ay ka wadaan dhaqdhaqaaqyo ciidan.
del.icio.us |
Digg
Comments (2 posted):
Post your comment