JANAQOW ALLAA JIRE, MA JIRRI BAAD MAANTA MEGEN U TAHAY ?? (Faallo)

Waxaad ogtihiin in ciidanka aad wasiirka u tahay shariifna madaxweynaha u yahay ay shacabka dhacaan, kufsadaan, dilaan, cid kasta oo ay ka xoog roonyihiinna dullaystaan, raciyada waa la idin weydiin baad nugu wacdi jirteene, aaway raciyadii idinka la idin weydiinayey?

Waxa aad ogtihiin in goobaha aad sheegatiin in aad xukuntaan marka baabuurta rakaabku ku soo dhawdahay ay rakaabk argagax iyo cabsi ka muuqato oo ay bisinka boobaan iyaga oo leh ereyo ay ka mid yihiin:

BISMILLAHI – AR FAATAXADA ISUGU KAANNA DARA in ilaahey kuwaan na mootiyo, ayna yartahay inta ay badbaadaan, way dhici kartaa in aad is tiraahdaan waa laga badbadinayaa ee isku daya in aad si fiican u baartaan, telefoonno ku raadisaan ehelkiinna hoose ee aan iyagu nasiib u helin in ay shubka madaxtooyada ku dhuuntaan ama dibedaha u dhoofaan ee daafihii xamarcadde daadsan, weydiiya?

Subxaanallaah, haddii qolo aan la aqooni xabbad kaarabiin idinku soo tuurto, ma ajnebi aan dalka u dhalan oo waa cadow aad shalay na dhihi jirteen baad leedihiin BII-EM  ku garaaca magaalada iyo maatida ku nool?

Ma illowdeen ilaahii weynaa ee maatidan abuurtay, ma illowdeen sakaraadkii xanuunka badnaa, ma illowdeen siraadkii iyo qiyaamihii la sugayey, ma adduunyo gebogebaa iyo cadow farax gelinti baad ku afar-afareysateen?

Shaki kuma jiro in aan miyirkiinnu joogin si kasta ha ku maqnaadee, anigu marna uma haysto haddii aadnaan markii hore munaafiqiin ahayn in aad waxa dhacaya 95% kala socotiin, waadna ogtihiin in qofka xil loo dhibaahi uu ka tegeyo caqligii iyo dareenkuu berigii hore lahaa?

Bal wejiga tirtirta, indhahana gacanta ku masaxa, bisinkana qabsada, daya halka aad taagantihiin, foolxumadeeda, is weydiiiya, 7 dii naarood xaggay idinka xigaan, 8 deeddii jannose xaggey idinka xigaan, hana illoobina oo ha fududaysanina in qof kasta oo dembi ku jiraahi uusan ogayn marka uu ku jiro ee qof og in uu ku suganyahay dembi lugu cadaabayo uusan sameeyeen?

Addoommo ilaahey xasuuqooda ma lugu gaaraa adduun iyo aakhiro diinta ku laabtee? xataa haddii sababtiinna ama marmarsiinyahiinna lugu xasuuqayo ma inaad sii fiirsataanaa mase haddii aadnaan joojin Karin in aad xilkaad sheeganaysiin isaga tagtaan oo aan magaciinna loogu ganban oo aan lugu gumaadin maatida?

Sow ma aragtaan maalin walba shaarubba weyntii iyo ma naxaankii qabqablaha ahaa oo saf idinku la jira, jaadka iyo khamradana idinku ag caba, idinkuna ag sinaysta, ma kuwaasaa shareeco islaam fulinaya, waanse u cudur daarayaa intooda badan allaha hnuuniyee oo diinta ma yaqaaniinn, wayna idinka cadaab yaraanayaan, inkastoo aysan naaru meel qabow lahayn, laakiin Janaqow iyo Shariifow cudurdaar ma lihidin  … SUBXAANALLAAH.

Waxaad ogtihiin in addoon mu’min ah dhiiggiisu ka culusyahay adduunyadoo la rogo, haddaba haddii maalin walba boqollaal agoon iyo indhoole ah la idinku hor xasuuqayo oo kuwaad mas’uuliyaddooda qaaddeen ilaahey hortiis ay xasuuqayaan ma waxay idin la tahay in aan waxba idinka soo gaareyn, mise xisaabtii aakhiraad inkirteen ?

SUBXAANALLLAAH, aaway diintii, damiirkii, raxmaddii, dadnimadii, dareenkii, akhlaakhdii,  derisnimadii, dhalashadii, adduunyadii, aakhiradii ………… ?

      Qolada mucaaradka sheeganaysana waxan leeyahay waxaa xaqiiq ah in dhulka aad ka talisiinu nabad u badanyahay intii macquul ah, laakiin mawduucyada xad fulintu iyagoo xaq ah oo aan amarkii alle cidna lagala gorgortamayn haddana fiirsha dadku xukun alle weli ma aysan arag,

islamarkaana ficillada xadku waa xad dhaaf, wixii xad dhaaf ahna nolosha ayey ka mid noqdaan oo lama qariibsado, marka waxay la mid noqonaysaa aniga oo qofna gacan ka gooya, qofna lacag ugu dara illeen saacad walba ayey dhacayaane, sidaas darteed idin ma lihi mana idin dhihi doono joojiya xadka alle, laakiin UDCU  ILAA SABIILI RABBIKA  BIL XIKMA, oo ka caqli qaata Ruuxii rasuulka ku lahaa waan sinaystey ee uu is illowsiinayey, maantey ka sii mudantahay in la is illowsiiyo wax badan,

       Midda kale dadkiinna u naxariista oo yareeya khasaaraha soo gaaraya haddii ay dhammaadaan shicibku joogi maysaan idinkuna, oo daya waxa aad tuuraysaan cidda ay wax u geysanaaan, iyo sidoo kale waxa lugu soo jawaabo khasaarahooda, xagguu idinka maray 9 kii qof ee dartood jihaad xaq ahaa ilaahey u joojiyey?

 DHEGTII WAANO QAADEEYSA BAA WAANO QAADATA.

Haddaad maqli weysaan maalin kalaad maqleysiin ee ajasha sugta.

Wabillaahi tawfiiq

Ali Jeyte.